ye qafas hii mujhako ajiiz hai ki mai.n jii sakuu.Ngaa qaraar se
mujhe ab chaman me.n na le chalo mai.n Daraa hu_aa huu.N bahaar se

mai.n baGair sajadaa guzar gayaa thaa rawaa dawaa dar-e-yaar se
meraa ishq aaj bhii saraGaraa.N hai usii gunaah ke baar se

Gam-e-aashiqii se bhii saKt thaa Gam-e-zi.ndagii kaa muqaabilaa
jo shikast khaa_ii to ro diyaa mai.n lipaT ke daamaan-e-yaar se

mai.n 'shakiil' kisako karuu.N gilaa hai meraa nasiib hii bewafaa
wahii mujhase karate hai.n dushmanii jinhe.n dekhataa huu.N pyaar se