thii wasl me.n bhii fikr-e-judaa_ii tamaam shab
wo aaye bhii to nii.nd na aa_ii tamaam shab

yak baar dekhate hii mujhe gash jo aa gayaa
bhuule the wo bhii hosh-rubaa_ii tamaam shab

mar jaate kyuu.N na subaho ke hote hii hijr me.n
takaliif kaisii kaisii uThaa_ii tamaam shab

garm-e-jawaab-e-shikawaa-e-jaur-e-uduu rahaa
us sholaa-buu ne jaan jalaa_ii tamaam shab

'momin' mai.n apane naalo.n ke sadaqe ke kahate hai.n
unako bhii aaj nii.nd na aa_ii tamaam shab