% prelude
ye inaayate.n Gazab kii ye balaa kii meharabaanii
merii Kairiyat bhii puuchhii kisii aur kii zabaanii
kabhii iltifaat-e-paiham kabhii mujhase badaGumaanii
terii wo bhii meharabaanii terii ye bhii meharabaanii

Kuub-ruuyo.n se yaariyaa.N na ga_ii.n
dil kii be-iKtiyaariyaa.N na ga_ii.n

akl sabr-aashanaa se kuchh na hu_aa
shauq kii bekaraariyaa.N na ga_ii.n

din kii seharaa-nawardiyaa.N na chhuTii.n
shab kii aKtar-shumaariyaa.N na ga_ii.n

the jo hamara.ng-e-naaz unake sitam
jinakii ummiidawariyaa.N na ga_ii.n

tarz-e-momin me.n marahabaa 'hasarat'
terii ra.ngii-nigaariyaa.N na ga_ii.n