kisii kii shaam-e-saadagii sahar kaa ra.ng paa ga_ii
sabaa ke paa.Nv thak gaye magar bahaar aa ga_ii

chaman kii jashn-gaah me.n udaasiyaa.N bhii kam na thii.n
jalii jo ko_ii shamm-e-gul kalii kaa dil bujhaa ga_ii

butaan-e-ra.ng-ra.ng se bhare the butakade magar
terii adaa-e-saadagii merii nazar ko bhaa ga_ii

merii nigaah-e-tishnaa-lab kii sar-Kushii na puuchhiye
ke jab uThii nigaah-e-naaz pii ga_ii pilaa ga_ii

Kizaa kaa daur hai magar wo is adaa se aaye hai.n
bahaar 'darshan'-e-hazii.n kii zi.ndagii pe chhaa ga_ii