khaalii hai abhii jaam mai.n kuchh soch rahaa huu.N
ai gardish-e-ayyaam mai.n kuchh soch rahaa huu.N

saaqii tujhe ek tho.Dii sii takaliif to hogii
saaGar ko zaraa thaam mai.n kuchh soch rahaa huu.N

pahale ba.Dii ragabat thii tere naam se mujhako
ab sunake teraa naam mai.n kuchh soch rahaa huu.N

phir aaj 'adam' shaam se GamaGii.n hai tabiiyat
phir aaj sar-e-shaam mai.n kuchh soch rahaa huu.N