jab pukaaraa hai tujhe apanii sadaa aa_ii hai
dil kii diiwaar se lipaTii hu_ii tanhaa_ii hai

hai ko_ii jauharii ashqo.n ke nagiino.n kaa yahaa.N
aa.Nkh baazaar me.n ik ji.ns-e-giraa.N laa_ii hai

dil kii bastii me.n tum aaye ho kyaa paa_oge
ab yahaa.N ko_ii tamaashaa na tamaashaa_ii hai

dil bhii aabaad hai ik shahar-e-Kamoshaa.N kii tarah
har taraf log magar aalam-e-tanhaa_ii hai

jis kii aa.Nkho.n se barasatii hai.n lahuu kii buu.Nde.n
ye wohii mohasin-e-aashuftaa-o-saudaa_ii hai