bechain bahut phiranaa ghabaraaye huye rahanaa
ik aag sii jazbo.n kii dahakaaye huye rahanaa

chhalakaaye huye chalanaa Kushbuu lab-e-laalii kii
ik baaG saa saath apane mahakaaye huye rahanaa

us husn kaa shevaa hai jab ishq nazar aaye
parde me.n chale jaanaa sharmaaye huye rahanaa

ik shaam sii kar rakhanaa kaajal ke karishme se
ik chaa.Nd saa aa.Nkho.n me.n chamakaaye huye rahanaa

aadat hii banaa lii hai tumane to 'muniir' apanii
jis shahar me.n bhii rahanaa ukataaye huye rahanaa