kho ke mahafil me.n terii sabr-o-qaraar aayaa huu.N
chand lamhe terii mahafil me.n guzaar aayaa huu.N

jazb hai Gu.Nch-e-maasuum kii nakahat mujh me.n
gum hai ra.ngiinii-e-Gulazaar-e-muhabbat mujh me.n
ban ke shaadaabii-e-unwaan-e-bahaar aayaa huu.N

wahii phuulo.n kii masarrat wahii Gu.Ncho.n kii uma.ng
wahii Kushbuu wahii aalam wahii mastii wahii ra.ng
ban ke sarataabaa qadam fasl-e-bahaar aayaa huu.N

merii aa.Nkho.n se tapakatii hai musalasal mayanaab
merii maKamuur nigaaho.n se umaDatii hai sharaab
dil me.n le kar asar-e-kaif-o-Kumaar aayaa huu.N